Fréttir

Vinnuverndarátakið 2019

25.6.2019

Heilbrigðir vinnustaðir - Meðferð hættulegra efna

Vinnuverndarátak Vinnuverndarstofnunar Evrópu 2018-2019

Hættuleg efni á vinnustað

Örugg meðferð hættulegra efna er mjög mikilvæg á vinnustöðum. Hættan sem stafar af efnum hefur áhrif á milljónir starfmanna um alla Evrópu og er oft vanmetin eða hunsuð.

Vinnuverndarátak Vinnuverndarstofnunar Evrópu (EU-OSHA), „Meðferð hættulegra efna“, var leyst úr vör 24. apríl 2018 en átakinu lýkur í lok þessa árs.

Átakið er samræmt af EU-OSHA og fleiri en 30 lönd taka þátt í því með stuðningi samstarfsaðila innan hvers lands. Í tilefni átaksins var haldin ráðstefna á Grand Hótel í Reykjavík 19. október og önnur í Hofi á Akureyri 24. október 2018.

Í ár verða einnig 2 ráðstefnur haldnar en sú fyrri verður nú á Ísafirði, miðvikudaginn 9. október en hin síðari á Grand Hótel Reykjavík 2 vikum seinna eða 23. október. Báðar ráðstefnurnar verða í 3 tíma, frá 12:30-16:00, en þeim verður streymt beint á vef Vinnueftirlitsins og upptökur af þeim verður hægt að nálgast á vefnum um ókomna tíð eins og aðrar slíkar ráðstefnur VER. 

Hægt er að sjá fyrri ráðstefnur á Youtube

Ráðstefna á Ísafirði 9. október 2019

Á Ísafjarðarráðstefnunni verður áhersla lögð á ábyrga meðferð hættulegra efna í fiskeldi og fiskiðnaði en einnig verður þar fjallað um aðrar hættur sem starfsmenn í þessum iðnaði standi frammi fyrir oft við erfiðar aðstæður og veðurskilyrði.

Sérstakur fyrirlesari verður Mariann Sandsund frá Sintef í Þrándheimi en hún stýrði stórri rannsókn sem stóð yfir árin 2016-19 um öryggi og heilbrigði í fiskieldi við strendur Noregs. Sintef er ein stærsta sjálfstæða rannsóknastofnun Evrópu með um 2000 starfsmenn sem sinna rannsóknum á fjölmörgum sviðum, þ.m.t. vinnuvernd.

Þá verða fjórir áhugaverðir innlendir fyrirlesarar á ráðstefnunni og vonandi fáum við sem flesta Vestfirðinga til að sitja ráðstefnuna en einnig aðra sem koma víðar að og eru áhugasamir um þessar stækkandi greinar.

SKRÁNING Á RÁÐSTEFNUNA Á ÍSAFIRÐI

Ráðstefna í Reykjavík 23. október 2019

Á Reykjavíkurráðstefnunni verða þrjú megin viðfangsefni.

Fjallað verður um öryggi við sprautumálun, sérstaklega bílasprautun en Vinnueftirlitið vinnur að nýrri reglugerð um um öryggis- og heilbrigðisráðstafanir við sprautumálun en núgildandi reglugerð er frá 1952.

Þá verður íslensk þýðing á e-tólinu kynnt en það er rafrænt verkfæri á netinu til að aðstoða fyrirtæki við að innleiða áhættumat vegna meðferðar á hættulegum efnum.

Einnig verður fyrirlestur á vegum öryggisnefndar Háskóla Íslands en mikil notkun er á ýmsum varsömum efnum af nemendum og kennurum í verklegri námi.

SKRÁNING Á RÁÐSTEFNUNA Í REYKJAVÍK

Áhættumat

Ýmis gögn um hættuleg efni eru í boði til að aðstoða fyrirtæki og þjónustuaðila við að framkvæma áhættumat, m.a. hér á vefsíðu Vinnueftirlitsins og á vefsíðu Vinnuverndarstofnunar Evrópu, þar sem einnig er að finna frekari upplýsingar um átakið .

Fésbókin

Síðast en ekki síst er minnt á fésbókarsíðu sem er tileinkuð átakinu þar sem m.a. má finna fjölbreytilegar upplýsingar um þær hættur sem stafa af hættulegum efnum og ábendingar hvernig unnt er að verja sig gegn þeim. Þá eru þar fréttir um vinnuverndarátakið og annað áhugavert efni tengt hættulegum efnum sem m.a. er fengið frá Vinnuverndarstofnun Evrópu og öðrum stofnunum og fréttaveitum.

Ítarefni