Fréttir

Nýtt verkfæri fyrir áhættumat

24.4.2015

Vinnueftirlitið hefur gefið út rafrænt verkfæri til að gera áhættumat á skrifstofum sem er ætlað þeim sem vinna almenn skrifstofustörf. Sérstök áhersla er lögð á aðstæður starfsfólks við skjávinnu.

Verkfærið er auðvelt í notkun, ókeypis og opið öllum. Í því eru settar fram tillögur og dæmi um úrbætur í vinnuumhverfinu, tilvísanir í lög og reglur og myndir til útskýringar. Verkfærið metur áhættu fyrir notandann og sér um að skrifa lokaskýrslu. Í framhaldinu þarf vinnustaðurinn að gera nauðsynlegar úrbætur. Áhættumatið skiptist í fjóra efnisþætti; almenn skrifstofustörf,  umhverfi og skipulag skrifstofu, starfsanda og streitu og vinnuverndarstarf. Skýringar á notkun eru gefnar í verkfærinu sjálfu sem er á netinu og heitir „Vinna á skrifstofu“.

Evrópska vinnuverndarstofnunin í Bilbao á Spáni og hagsmunaaðilar á vinnumarkaði standa saman að gerð áhættumatsverkfæra undir nafninu OiRA sem stendur fyrir Online interactive Risk Assessment, eða á íslensku; rafrænt gagnvirkt áhættumat. Í dag taka 16 Evrópuríki þátt í þróun verkfæra og fleiri eru á leiðinni.
Online interactive risk assessment - Gagnvirkt rafrænt áhættumat