Fréttir

Niðurstöður úr eftirlitsátaki í byggingariðnaði í september 2003

5.11.2003

Kröfur gerðar um úrbætur á 65% byggingarvinnustaða

Vinnueftirlitið tekur þátt í Evrópsku eftirlitsátaki á byggingarvinnustöðum sem fram fer árin 2003 og 2004. Alls taka 17 þjóðir þátt í átakinu þ.e.a.s. öll 15 aðildarríki Evrópusambandsins auk Íslands og Noregs sem eru aðilar að hinu Evrópska efnahagssvæði. Átakið er framkvæmt samtímis í öllum löndunum. Fyrsti hluti átaksins fór fram í júní 2003 og hafa þegar verið birtar niðurstöður úr því átaki. Næsti hluti og sá seinni sem framkvæmdur er á árinu 2003 fór fram 8. til 19. september. (sjá nánar skýrslur neðar á síðunni, grein um átakið og sérstakan kynningarbækling).

Í átakinu í september var skoðað m.a. sérstaklega hvernig staðið var að fallvörnum t.d. á vinnupöllum, þökum, umhverfis göt í gólfi og alls staðar þar sem hætta er á falli. Metið var hvernig verktakar standa að vali, notkun og viðhaldi tækja og búnaðar og hvernig verktakar velja sér undirverktaka.

Einnig var sérstaklega skoðað hvernig verkkaupar og verktakar standa sig í að uppfylla kröfur sem fram koma í reglum nr. 547/1996 um aðbúnað, hollustuhætti og öryggisráðstafanir á byggingarvinnustöðum. Í því sambandi voru eftirfarandi atriði skoðuð:

  • hafði samræmingaraðili öryggis- og heilbrigðismála verið skipaður
  • hafði verið gerð öryggis- og heilbrigðisáætlun
  • hafði byggingarframkvæmdin verið tilkynnt til Vinnueftirlitsins
  • var öryggis- og heilbrigðishandbók fyrirliggjandi.

Helstu niðurstöður átaksins í september voru eftirfarandi:

  • heimsóttir voru 92 byggingarvinnustaðir í öllum umdæmum
  • starfsmannafjöldi á þessum 92 byggingarvinnustöðum var alls 1335
  • fjöldi verktaka og undirverktaka á þessum 92 byggingarvinnustöðum var alls 277
  • gerðar voru skriflegar kröfur um meiri eða minni úrbætur hjá  60 af þessum 92  byggingarvinnustöðum sem gerir 65% staða
  • vinna var bönnuð á 2 stöðum
  • öryggis- og heilbrigðisáætlanir vantar á u.þ.b. 43% byggingarvinnustaða
  • byggingarvinnustaðir með fleiri en 50 starfsmenn uppfylla kröfur best.

Hér fyrir neðan má sjá niðurstöður átaksins. Skilað var skýrslu eftir stærð fyrirtækja, en stærðarflokkarnir eru fyrirtæki með 1-5 starfsmenn, 6-20, 21-50 og fleiri en 50 starfsmenn. Einnig er skýrsla þar sem sjá má útkomuna hjá öllum fyrirtækjum samanlagt.


Átakið heldur áfram árið 2004. Jafnframt verður Evrópska vinnuverndarvikan 2004 tileinkuð byggingariðnaði.