Fréttir

Kulnun – hvað höfum við lært sem nýtist okkur nú?

20.5.2020

Eftirmiðdagsfundur með Christinu Maslach - brautryðjanda í vinnutengdri kulnun

Vinnueftirlitið, Embætti landlæknis og VIRK bjóða upp á eftirmiðdagsfund með Christinu Maslach, prófessor við Berkeleyháskóla í Kaliforníu, á netinu þriðjudaginn 26. maí klukkan 15.00. Fundinum verður streymt á vefsíðum stofnananna þriggja.

Christina-MaslachDr. Christina Maslach er bandarískur sálfræðingur og prófessor í sálfræði við Berkeley háskóla í Kaliforníu. Hún hefur unnið að rannsóknum á ýmsum sviðum innan félags- og heilsusálfræði en er þekktust fyrir að vera brautryðjandi í rannsóknum á vinnutengdri kulnun. Hún er meðhöfundur þess mælitækis sem er mest notað á sviði kulnunar Maslach Burnout Inventory (MBI), en það er til í fimm útgáfum sem sniðnar eru að mismunandi starfsstéttum.

Maslach hefur skrifað fjölmargar greinar og bækur um kulnun og hlotið ýmsar viðurkenningar fyrir sín störf. Alþjóðaheilbrigðismálastofnunin (WHO) notar skilgreiningu á kulnun í flokkunarkerfinu ICD-11 sem er í samræmi við skilgreiningu Maslach.

Linda Bára Lýðsdóttir, doktor í sálfræði og sviðsstjóri hjá VIRK, fer yfir stöðuna á Íslandi í byrjun fundarins á þriðjudag. Erindi Maslach verður á ensku. Áhorfendum mun gefast kostur á að senda inn fyrirspurnir með tölvupósti til fundarstjóra.

Eftirmiðdagsfundurinn 26. maí er fimmti fundurinn í fundaröð um heilsueflingu á vinnustöðum og er hluti af samstarfi Vinnueftirlitsins, Embættis landlæknis og VIRK um heilsueflingu og forvarnir á vinnustöðum. Markmið samstarfsins er að stuðla að betri heilsu og vellíðan vinnandi fólks, fyrirbyggja kulnun og minnka brottfall af vinnumarkaði.

Upptaka frá eftirmiðdagsfundinum

Kulnun