Frumnámskeið

Frumnámskeið er námskeið fyrir minni vinnuvélar. 

Námskeiðið veitir bókleg réttindi fyrir:  

  • Lyftara með 10 tonna lyftigetu og minni - J flokkur
  • Dráttarvélar með tækjabúnaði og minni gerðir jarðvinnuvéla (4t og undir) - I flokkur
  • Körfukrana og steypudælur - D flokkur
  • Valtara - L flokkur
  • Útlagningarvélar fyrir bundið slitlag - M flokkur
  • Hleðslukrana á ökutækjum með allt að 18 tm lyftigetu - P flokkur

Námskeiðin í Reykjavík eru haldin í húsnæði Vinnueftirlitsins að Dvergshöfða 2, 110 Reykjavík, 2. hæð. 

Námskeiðið er haldið á íslensku og prófið er á íslensku.
Þeir sem ekki skilja mjög vel íslensku geta ekki setið námskeiðið.

Ef námskeið eru haldin á öðrum tungumálum en íslensku er þess sérstaklega getið í námskeiðsáætlun hér fyrir neðan. 

Námskeiðið er 27 tímar, haldið í minnst þremur áföngum (á þremur dögum) og að öllu jöfnu innan reglubundins vinnutíma, þ.e. frá kl. 9:00 til 16:00.

Fyrsti dagur á Frumnámskeiði kallast fornám og fjallar um vinnuverndarmál, eðlisfræði, vökvafræði, vélfræði, rafgeyma og öryggi við skurðgröft.  Dagar 2 og 3 fjalla um einstaka flokka vinnuvéla og fleira þeim tengt. 
Frumnámskeiði lýkur með skriflegu krossaprófi.  Krafist er 100% tímasóknar til að ljúka námskeiðinu.
Hægt er að skrá sig á námskeið á slóðinni: http://skraning.ver.is/  

Hægt er að halda sérstök námskeið fyrir tiltekin fyrirtæki eftir nánari óskum. Upplýsingar og skráning á námskeið sem haldin eru utan höfuðborgarsvæðisins fást á skrifstofum Vinnueftirlitsins á landsbyggðinni.

Verkleg þjálfun 

Standist nemendur próf að loknu Frumnámskeiði geta þeir hafið verklega þjálfun hjá atvinnurekanda í stjórn og meðferð vinnuvéla. Verkþjálfun skal fara fram undir leiðsögn leiðbeinanda sem hefur réttindi til kennslu og þar sem ekki er margt fólk eða slysahætta.

Verklegt próf og vinnuvélaskírteini 

Þegar nemandi er kominn með staðfestingu á að lokið sé verklegri þjálfun óskar hann eftir prófdómara frá Vinnueftirlitinu og fer í verklegt próf. Standist nemandi prófið fær hann staðfestingu á því hjá prófdómara sem hann framvísar hjá Vinnueftirlitinu um leið og hann sækir um vinnuvélaskírteini fyrir viðkomandi vél/vélar. Greiða þarf fyrir verklegt próf og skírteini við próftöku eða áður en próf er tekið. Með umsókn um vinnuvélaskírteini þarf að fylgja afrit af ökuskírteini. Þegar sótt er um kranaréttindi, fyrir flokka A, B, D og P, þarf viðkomandi að framvísa læknisvottorði .

Hvað þarf maður að vera orðinn gamall til að fá vinnuvélaréttindi? 

Það er 16 ára aldurstakmark til að geta setið Frumnámskeið en þremur mánuðum fyrir 17 ára afmælisdaginn getur viðkomandi farið að æfa sig á tæki undir leiðsögn einstaklings með kennararéttindi á vélina. Til að fá vinnuvélaréttindi verður viðkomandi að vera orðinn 17 ára og hafa bílpróf.


Hægt er að sjá lista yfir komandi Frumnámskeið og skrá sig á þau á slóðinni: http://skraning.ver.is


Grunnnámskeið

Ökuskólar halda réttindanámskeið fyrir vinnuvélar sem kallast Grunnnámskeið. Grunnnámskeið er námskeið sem ákveðnir ökuskólar halda og er 80 kennslustunda námskeið. Námskeiðið gildir fyrir alla vélaflokka sem krafist er réttinda á.